ប្រាសាទបន្ទាយទ័ពនៅឃុំថ្មពួកទទួលបានការថែទាំ អភិរក្ស អភិវឌ្ឍស្របាលគ្នានឹងប្រាសាទបន្ទាយឆ្មារដែរ ដូចជាស្ថាបនាផ្លូវក្រាលក្រួសបានកាប់សម្អាតព្រៃ ការរៀបចំបរិស្ថាន ហើយក៏មានការសាងសង់អាសនៈថ្មីដ៏ធំមួយ នៅជ្រុងនិរតីប្រាសាទ ទុកជាទីសក្ការៈ បូជាបន្ថែមផងដែរ។ បើគិតពីទំហំខូចខាតប្រាសាទទាំងពីរគឺប្រហាក់ប្រហែលគ្នា។ ឯភាពល្បីល្បាញរបស់ប្រាសាទបន្ទាយទ័ព គឺទីនេះជាប្រភពនៃរូបបដិមាព្រះបាទជ័យវរ្ម័នទី៧ប្រក់នាគទ្រង់គង់សមាធិ បែបព្រះពុទ្ធសាសនា មានចំនួន៥អង្គ។ សព្វថ្ងៃបដិមាពូកែស័ក្ដិសិទ្ធិទាំងនេះ ដែលគេហៅថា ''ព្រះអង្គធំ ឬលោកឪធំ'' បានត្រូវគេយកទៅដាក់នៅសារមន្ទីរ។ ប្រាសាទមានទំហំធំនេះត្រូវរលំអស់មួយភាគធំកំពុងត្រូវបានជួសជុលជាបន្តហើយ។ប្រាសាទនេះត្រូវបានកសាងឡើងដោយព្រះបាទជ័យវរ្ម័នទី៧ នៅចុងសតវត្សរ៍ទី១២ មានស្ថាបត្យកម្មស្រដៀងនឹងប្រាសាទព្រះប៉ាលីឡៃ។ ប្រាសាទកសាងដោយប្រើប្រាស់ថ្មមានក្បាច់ចម្លាក់ស្រាប់ ជាថ្មរបស់ប្រាសាទចាស់ណាមួយនៅក្បែរនោះ និងមានប្រាង្គធំៗ ខ្ពស់ៗមានកម្ពស់ប្រហែល៣៥ម៉ែត្រ។ ប្រាសាទនេះ មានប្រាងចំនួន៥ ប្រាង្គធំនៅកណ្ដាល រីឯប្រាង្គតូចបួនផ្សេងទៀតនៅចំទិសទាំងបួន មាននាទីជាខ្លោងទ្វារ ហើយភ្ជាប់មកប្រាង្គកណ្ដាលដោយរោងទង។ គេអាចឃើញភាពខុសប្លែកពីប្រាសាទមួយទៅមួយ និងពិដានឈើដែលបានបន្សល់ទុក។